Petition for mandamus ni kapitan Pagalan gipaboran sa korte

CEBU, Philippines — Ang Regional Trial Court (RTC) Branch 90 sa Danao City ni-grant sa petition for mandamus nga gi-file ni Esperanza, Pilar Barangay Captain Mario Pagalan batok sa National Liga ng mga Barangay ug Pilar Vice Mayor Chiziline Maratas.

Ang reklamo nagsugod human ang Sangguniang Bayan giingong nagdumili sa pag-ila kang Pagalan isip elected Liga ng mga Barangay President sa Pilar Chapter ug isip ex-officio member sa municipal council.

Si Pagalan napili isip LNB-Pilar Chapter president niadtong December 15, 2023 Liga Elections human siya lang ang nag-inusarang kandidato nga qualified nga modagan sa maong posisyon.

Ni-asumir dayon kini sa katungdanan ug nitambong og sessions sa Sangguniang Bayan.

Apan niadtong Pebrero 9, 2024 ang Sangguniang Bayan nagdumili sa pag-ila kaniya ug giingong wala na siya giapil sa roll call.

Gawas niini, ang iyang sweldo, benefits ug ubang entitlement giingong gipugngan sukad niadtong December 15, 2023.

Pagka May 22, 2024 ang Liga nideklarar og failure of elections ug gikinahanglan mohimo og special election.

Nisang-at si Pagalan og motion for reconsideration nga nagkwestiyon sa maong mando nga sukwahi sa balaod.

Sa desisyon nga gipagawas sa RTC niadtong April 8, 2025 ang korte ni-grant sa writ of mandamus ngadto sa petitioner ug nagmando sa National Liga ng mga Barangay nga ideklarar ug ikompirmar si Pagalan isip elected President sa Liga ng Barangay-Pilar Chapter ug tugotan kini nga makaasumir sa opisina. (BANAT NEWS)