Disqualification case batok ni Durano gibasura sa Comelec
CEBU, Philippines — Gibasura sa Commission on Elections (Comelec) ang disqualification case nga gisang-at batok sa kanhi kongresista ug karon nilansar pagka-mayor sa Lungsod sa Poro, Isla sa Camotes nga si Red Durano.
Ang petisyon batok kang Durano gipasaka kini ni Clifford Rey Borlasa kinsa naghangyo sa Comelec nga kanselahon ang certificate of candidacy ni Durano tungod kay kwestiyonable ang residency niini sa Barangay Esperanza, Lungsod sa Poro diin sa maong lugar si Durano magpapiling mayor.
Apan ang Comelec Second Division nibasura sa kaso tungod sa kakulang niini og merito.
"Petitioner utterly failed to establish that respondent made material mispresentation in his COC regarding his residency in Poro, Cebu", tipik sa desisyon sa Comelec nga gipirmahan ni Presiding Commissioner Rey Bulay.
Ang kabahin sa kopya sa desisyon sa Comelec gi-post kini sa official Facebook page ni Durano nga Ramon "RED" H. Durano VI, kagahapong adlawa, Abril 14, 2025.
Ang kampo ni Durano, pinaagi ni Atty. Maryglie Angelie Delicano nagkanayon nga gihangop sa ilang kampo ang maong desisyon sa Comelec.
"The effect of Comelec's resolution is clear. Mr. Red Durano's name stays in the ballot. He is qualified to be chosen as the mayor of Poro. The Porohanons have the freedom to choose Mr. Durano", matud ni Delicano sa susamang pamahayag diha sa maong Facebook page. (BANAT NEWS)
- Latest
