Mga pasahero nidagsa na sa terminals ug pantalan   

CEBU, Philippines — Midagsa na ang mga pasahero sa mga terminal ug pantalan sa Central Visayas alang sa pagbakasyon tungod sa Semana Santa samtang ang Land Transportation Franchising and Regulatory Board-7 mipasalig nga dunay igong bus nga masakyan ang mga pasahero  karong panahona. Si LTFRB Director Eduardo Montealto nga nahinabi sa Banat News/DyRF1215 miingon nga dunay 88 ka mga bus nga ilang gihatagan og special permit aron makabiyahe sa gawas sa ilang mga rota. Hangtud ning pagbalita, modawat pa gihapon sila og mga aplikasyon para sa special permit.

Mipasidaan sab si Montealto nga adunay mga road inspections ug inspection sa mga pasaheroan diha sa terminal aron pagsigurong luwas sakyan ang mga pasaheroan.

Niadtong adlaw nga Domingo, 35,000 ka mga pasahero na ang natala nga nigawas ug nisulod sa mga pantalan sa Cebu sumala pa sa Cebu Ports Authority.

Si Maryknol Bolasa, ang tigpamaba sa CPA miingon nga opisyal ng nagsugod ang Oplan Biyaheng Ayos: Holy Week and Summer Vacation 2025. Basi sa ilang monitoring, ang inbound nga mga pasahero o kadtong nisulod sa mga pantalan sa Cebu adtong Domingo niabot og 16,173 samtang ang outbound 19,809.

Dunay 16 ka mga pantalan sa Central Visayas nga tanan pwedeng agian sa mga pasahero.  Gipaabot ni Bolasa nga karong Miyerkules Santo mas  modaghan ang mobiyahe ug sa Sugat Kabanhawan ini og Domingo kay mamalik na gikan namakasyon ang mga tawo.

Sa pikas bahin, gipanglantawan sa City of Talisay-Traffic Operation Development Authority (CT-TODA) nga maghuot ang mga sakyanan diha sa dagkong mga dalan padung sa habagatang Sugbu kay maoy kataposang adlaw tingtrabaho sa Semana Santa.

Matud ni Jonathan Tumulak, pangu sa CT-TODA, sa Miyerkules kasagaran ang katapusan nga adlaw sa pagtrabaho mao nga modagsa gyud ang mga sakyanan nga gustong makauli sa probinsya.

Si Tumulak miingon nga ilahang tutokan sa maong adlaw ang  N. Bacalso Avenue sa Barangay Bulacao ug sa Linao.

Ang tambag ni Tumulak sa mga mobiyahe nga mas maayo kin sa petsa 18 sila molarga kay hawan na ang karsada. (BANAT NEWS)