Palma mangulo sa Bendisyon sa Lukay karon

CEBU, Philippines —  Si Cebu Archbishop Jose Palma maoy mangulo sa kalihukan sa Palm Sunday karon adlawa Abril 13, 2025 sa Cebu Metropolitan Cathedral.

Ang arsobispo mopahigayon sa Santos nga Misa ug mobendita sa mga lukay sa alas 7:30 sa buntag.

Matud pa sa Arsobispo, matag tuig gidala kita sa simbahan niining pagsugod sa Semana Santa pinaagi sa pagbendita sa lukay.

Pinaagi sa bendita sa lukay si Palma miawhag sa tanan nga pamalandongan ang kadako sa gugma sa Dios sa tawo.

Kay bisan pa nasayod kini nga kamatayon ang padulngan niini  bukas niya kining gidawat sa iyang kasingkasing uban sa dakong pagsalig tungod sa dakong gugma niini sa mga tawo nga nagpakasala.

Dugang pa sa Arsobispo, ning pagsugod sa pagtimaan sa Semana Santa, pamalandongan sa mga magtutuo ang kasagrado ug importansiya sa okasyon pinaagi sa pagdawat og grasya sa kinabuhi ug biyaan ang mga butang nga dili maayo o pagpakasala.

Karong adlawa ang tibuok Simbahang Katoliko mopahigayon sa pag bendita sa lukay matag human sa Santos nga Misa isip pagbukas na sa Semana Santa. (BANAT NEWS)