Laing plantasyon sa marijuana nadiskubrehan

CEBU, Philippines — Lain napud plantasyon sa Marijuana ang nadiskubrehan ug gironda sa mga sakop sa City Mobile Force Company-Cebu City Police Office, Regional Police Drug Enforcement Unit-7 ug ubang units diha sa Sitio Lupa, Barangay Sudlon II, Siyudad sa Sugbo alas 10 kagahapon sa buntag, Biyernes, Abril 11, 2025.

Ikaduha na kini nga plantasyon nga gironda sa kapolisan sa bukirang barangay sa Cebu City niining semanaha.

Ang City Mobile Force Company-Cebu City Police Office pinangulohan ni Police Lieutenant Colonel Ferdinand Casiano samtang ang Regional Police Drug Enforcement Unit-7 ang nangulo mao si Police Lieutenant Colonel Wilfredo Tan.

Giibot ug gisunog sa kapulisan ang dili momenus 7,000 stalks sa fully grown marijuana nga gibana-banang nagkantidad og P1.5 million.

Giingong gitanom kini sa nagkadaiyang dapit sa barangay sa tuyo nga dili dayun mahalata sa mga otoridad apan bisan pa niini, adunay mga residente nga nisumbong hinungdan sa maong operasyon.

Walay nadakpan sa maong operasyon apan padayon ang ilang imbestigasyon labot niini.

Sayo ning semanaha, gipanglarot sab sa kapolisan ang 6,000 ka punoan sa marijuana ug 500 ka semilya niini diha Sitio Maraag sa mao gihapong barangay.   IBM BANAT NEWS