Gullas: Taytayan sa Mananga pabiling lig-on

CEBU, Philippines — Pabilin nga lig-on ang taytayan sa Mananga sa Barangay Tabunok, Dakbayan sa Talisay.

Kini maoy gipahibawo ni Mayor Gerald Anthony “Samsam” Gullas, Jr. dihang iyang nahinabi si Engineer Leslie Anthony Molina sa 2nd engineering district sa Department of Public Works and Highways (DPWH).

Si Gullas nagkanayon nga daghan ang nipahibawo kaniya sa sitwasyon sa Mananga hinungdan nga iyang gitawag ang atensiyon sa DPWH.

Gibutyag ni Gullas nga ang DPWH nipadayag kaniya nga wala magtakdo o nag-abot ang two sections sa tumoy sa south bound bridge tungod sa depektoso nga bearing pad.

Ang bearing pad mao ang goma nga maoy magpatunga sa pinakaibabaw sa taytayan ug sa pundasyon.

Gibutang kini aron kong adunay paglihok sa yuta dili dali nga maguba ang taytayan.

Nasayran ni Gullas nga ang pundasyon sa taytayan wala maunsa ug pabilin kini nga lig-on. Sa makita sa ibabaw sa taytayan nikang-a kini og mga 6cm apan kong maabot na ang bag-ong bearing pad ilaha ra kining ipasok aron magtakdo na pagbalik ang taytayan. Sa pagkakaron, nagkasabot sila nga ang gagmay nga sakyanan ug passenger buses lang una ang gitugotan nga makaagi sa taytayan. Kadtong mga 10-wheeler trucks adto una sa Cebu South Coastal Road (CSCR) moagi. BDB BANAT NEWS