Konduktor, gwardiya nangmolestiya

CEBU, Philippines — Gitanggong karon sulod  sa detention cell  ang konduktor  sa modern jeepney  human gireklamo  sa 22 -anyos nga dalaga  kay gi “lips to lips” kini sa miaging Martes sa gabii samtang siya natulog sa lawak  sa ilang panimalay sa Purok Tambis, Barangay Yati,  Liloan.

Ang gisikop giila sa kapulisan mao si Benjie Villarante  Tanaquillo,  34, taga Sitio Ilaya Barangay Luyang sa San Remegio nga temporaryong nagpuyo sa maong dapit.

Samtang ang  biktima nga dalaga  nga taga Borbon ug temporayo usab nga nagpuyo sa maong dapit.

Gikatahong gisulod sa suspek sa lawak ug gitaparan sa higdaanan ug kalit gi lips to lips samtang kini natulog ang dalaga. Nakamata ug nakurat ang dalaga ug nakasinggit sa pagpangayo’g panabang , daling mikaratil og sibat ang suspek apan nadakpan gihapon kini sa kapolisan.

Samtang gibalhog sa prisuhan ang usa ka 42-anyos nga lalakeng security guard human gireklamo nga mimolestiya og 10-anyos nga batang babaye diha sa Governor M. Cuenco, Barangay Banilad, siyudad sa Sugbo niadtong Miyerkules sa gabii, Abril 9, 2025.

Ang suspek gidakop kini sa amahan sa biktima human ang bata nisumbong nga gihikap niini ang iyang dughan samtang nagkuha siya sa iyang iro sa gawas sa ilang balay.

Ang suspek gibalhog karon sa Mabolo Police Station 4.  Apan gihimakak niini ang pasangil sa bata, matud niya igo ra niyang ang kilid sa bata sa dihang iyang gitabangan pagkuha ang bola niini.

Ang mga suspek pasakaan og kasong Acts of Lasciviousness samtang dugang kaso nga paglapas sa Republic Act 7610 o Child Abuse ang gwardiya.— Decemay P. Padilla, Romeo D. Marantal (BANAT NEWS)