Bayani nga Talisaynon lakip na sa itudlo sa public schools

CEBU, Philippines — Lakip na unya sa itudlo sa mga tinun-an sa pampublikong tunghaan ang lokal nga kasaysayan sa Dakbayan sa Talisay.

Gikan sa paghimugso sa Talisay gikan pa sa panahon sa Espanyol, gubat sa kalibutan ug hangtud karon.

Kini maoy ilang nakab-ot nga kasabotan tali sa lokal nga kagamhanan sa Talisay pinaagi ni Sangguniang Kabataan (SKF) Federation president, Dr. Richel Bacaltos, presidenti sa Talisay City College (TCC), kadagkuan sa Department of Education (DEPED) sa Talisay pinaagi ni Dr. Christine Paquibot nga mao ang assistant school division superintendent.

Gihimo ang pinirmahay sa Memorandum of Understanding (MOU) atol sa ika-127 ka tuig nga paghandum sa magsuon nga Cuatro Aliño.

Ilang nasabutan nga sunod school year ilakip na sa itudlo sa kabataan sa elementarya, highschool ug college ang kalabot sa kasaysayan sa Talisay ug ang mga tawo nga nag una nga maoy responsable sa kagawasan nga atong natagamtam karon.

Matud pa ni Bacaltos nga dili lang kutob sa makat-on ang kabataan sa kasaysayan pero puy-an kini diha sa adlaw-adlaw nga pakigbisog isip usa ka Talisaynon.

Si Paquibot nitataw nga ilakip na unya ang dugang research ug community projects. Ang pagpinirmahay sa MOU gitambongan sa pamilyang Aliño uban sa 21gun salute, wreath laying ug pagyukbo sa magsuong Sulpicio, Potenciano, Felix ug Hilario Aliño. (BANAT NEWS)