Dumptruck nidaro sa mga motor ug sakyanan, usa patay

CEBU, Philippines — Usa ang patay human gidaro sa usa ka dump truck ang laing truck, sakyanan ug mga motorsiklo sa Sitio Tapuko, Barangay Pit-os, siyudad sa Sugbo, Huwebes sa gabii, Marso 20, 2025.

Ang mga nalambigit sa disgrasya gilangkuban sa Ford Raptor nga gimaneho sa usa ka 28 anyos nga lalake, taga Barangay Pit-os; dump truck nga gimaneho sa usa ka 67-anyos nga lalake nga taga dakbayan sa Naga; Honda Beat nga motorsiklo nga ang driver usa ka alyas Jeffrey, ug backride niya si alyas Suzett, pulos taga Barangay Paril, Cebu City.

Apil sab sa disgrasya mao ang Honda Click motorcycle nga gimaneho ni alyas Paul; Honda RS motorcycle nga gimaneho ni alyas John ug backride niya si alyas Samuel; Yamaha Mio motorcycle nga gimaneho ni alyas Ryan, taga Barangay Binaliw kinsa namatay sa hitabo ug naangol ang 3-anyos nga anak sa biktima; usa ka self-loading truck nga gimaneho ni alyas Bautista, taga Barangay Cogon, Naga City.

Ang nidaro nila mao ang dump truck nga gimaneho sa usa ka alyas Manolo,  nga taga Lungsod sa Argao.

Base sa imbestigasyon sa Traffic Enforcement Unit Cebu City Police Office si alyas Bautista temporaryong nihunong tungod kay ang truck boy niini niisa sa nagbitay nga mga wires gamit ang kahoy ug PVC Pipe.  Nakamugna kini matud pa og traffic, ang Ford Raptor nagsunod sa maong dump truck. 

Samtang ang suspect nga si alyas Manolo nga paingon sa Talamban area giingong ni-counter flow padung sa Binaliw area.

Gumikan may dulhugon man ang agianan giingong naharos niini ang maong mga sakyanan ug motosiklo.

Ang namatay nga si alyas Ryan daling niitsa sa iyang 3 anyos palayo kaniya sa dihang padung na sila madaro sa trak.

Kasong Reckless Imprudence Resulting in Homicide and Physical Injuries and Damage to Properties ang ipasaka batok sa suspetsado.   IBM BANAT NEWS