CSC dunay pahimangno sa mga kawani sa gobyerno

CEBU, Philippines — Ang Civil Service Commission (CSC) mipahimangno sa mga empleyado sa gobyerno nga likayan nga malambigit sa partisan political activities karong panahon sa eleksyon.

Ubos sa Joint Commission on Election (COMELEC) – CSC Advisory sa Electioneering ug Partisan Political Activities, adunay mga gidili nga himoon sa mga empleyado sa gobyerno karong nagkaduol na ang May 12, nga piniliay.  Lakip sa gidili ang pagporma og grupo, asosasyon o komitiba aron mosolicit og boto o pangampanya ; pagpahigayon og political rallies, caucus, meetings o parade alang sa election campaigning; mohimo og speeches, announcements or media commentaries pagsuporta o pagbatok sa usa ka kandidato ug pag publisar, pag apud-apod o pagdisplay og campaign materials pagsuporta o pagkontra sa usa ka kandidato.

Ang mga empleyado sa gobyerno nga sakop sa maong mga gidili nga gilatid sa CSC mao ang mga personnel sa tanang branches, subdivision, instrumentalities ug ahensya sa gobyerno sa Pilpinas; mga empleyado sa mga government -owned and controlled corporations (GOCCs), state universities ug colleges; uniformed ug active personnel sa Armed Forces of the Philippines ug sa Philippine National Police (PNP) ug bisan kadtong mga empleyado nga on leave of absence. Ang mapamatud-an nga nalambigit sa partisan political activities mahimong mag-atubang og administrative charges diin sa first offense, masuspenso og usa ka bulan ngadto sa unom ka bulan ug sa second offense, mamahimo na nga ma dismiss sa serbisyo ug posibleng mawad-an og benefits ug madisqualify sa umaabot nga pagpanarbaho sa gobyerno.

Nipahimangno usab ang CSC nga kinahanglan responsable ang mga empleyado sa gobyerno sa pag-gamit og social media.

Apil sa gipahinumdom sa ahensya nga dili mag post, share o mokomento sa mga political content; likayan ang paggamit sa mga government-issued devices o internet alang sa diskusyon sa politika; likayan nga malambigit sa mga argumento sa politika sa online ug dili mobutyag sa mga official government information nga walay sakto nga authorization. (BANAT NEWS)