Condominium gipasirad-an kay delikadong masunog

CEBU, Philippines — Usa ka condominium sa Barangay Mabolo sa Dakbayan sa Sugbu ang gi-isyuhan sa Bureau of Fire Protection(BFP) og closure order human wala sila makatuman sa fire safety regulations.

Nagkanayon si Senior Fire Officer 2 Wendell Villanueva, tigpamaba sa Cebu City Fire Station nga ang maong condominium daghan og kalapasan nga nahimo dihang gi-inspection sa kabomberohan.

Usa niini, wala silay smoke control systems ug atrium fire protection, defective fire detection, alarm ug communication system.

Apan bisan paman sa notice to comply nga gihatag sa kabomborehan giingong wala gihapo'y gihimo ang tagdumala hinungdan nga gi-isyuhan na sab sila og notice to correct violation with corresponding penalty.

"Subsequent na nga i-issue nato basta wala sila'y action sa notice to comply, sa mga findings namo," sigon ni Villanueva.

Subli nilang gisusi ang maong condominium ug wala gihapo'y aksyon nga gibuhat ang kadagkuan sa condominium maong gipaskilan kini og tarpaulin nga dunay nakasuwat nga "WARNING: THIS BUILDING/STRUCTURE IS A FIRE HAZARD."

Gumikan kay wala man matuman ang fire safety regulations niadtong Marso 13,2025 ni-issue na og closure order ang BFP ug gipaskil kini didto sa maong condominium. IBM BANAT NEWS