Pagbayad sa Digital Traffic System sa siyudad sutaon

CEBU, Philippines — Nangita karon og katin-awan ang Cebu City Treasurer’s Office ilabi na kabahin sa legal nga aspeto sa ilang gahum pagpugong sa pagbayad sa supplier sa Digital Traffic System.

Sa suwat nga pinirmahan ni Cebu City Treasurer Mare Vae Reyes, nihangyo siya og legal opinion gikan sa city attorney`s office kabahin sa maong isyu. Niadtong Pebrero 25, 2025 ang ilang opisina nakadawat og Disbursement Voucher (DV) nga dunay mga supporting documents alang sa pag process sa kantidad nga Php 120,128,485.85 alang sa "Partial Payment" sa 63.38% nga work accomplishment sa kontrata sa Digital Traffic System (PHASE 2).

Sa nasayran ang proyekto giinstalar diha sa mga intersection sa kadalanan sa Cebu City, diin ang siyudad mobayad sa Triune Cylix Joint Venture.Dugang niini nga sa wala pa nila madawat ang DV, ang pangu sa Department of Engineering and Public Works (DEPW), Engr. Lowell M. Corminal, ug ang Office of the City Accountant, pinaagi ni Mr. Jerome V. Ornopia, pangu sa Accounting Unit, ang mihatag og approval ug nipirma sa maong vouchers isip kabahin sa payment procedure.

Gipirmahan usab kini ni Roseny G. Reyes, Acting City Budget Officer sa dakbayan kinsa mi-certify sa maong appropriation.

Kahinumduman gikwestyon kini sa konseho gumikan sa mga kontrobersiya sa sunod sunod nga resolusyon apil na ang pamahayag ni Cebu City mayor Raymond Alvinn Garcia nga ilakip ang pagbayad sa Phase 3 sa 2025 annual budget. Ang konseho nihangyo sa Commission on Audit (COA) nga mohimo og fraud audit kabahin sa Digital Traffic System project, ilabi na sa mga kontrata sa mga contractor.

Giaprobahan sa konseho ang resolusyon og giawhag si mayor Garcia sa pag withhold sa pagbayad sa Phase 2 sa proyekto hangtud nga mogawas ang resulta sa fraud audit. The Freeman