Garcia mohangyo nga gamiton sa siyudad ang luna sa probinsiya

CEBU, Philippines — Nipasalig si Cebu City Mayor Raymond Alvin Garcia ngadto sa mga biktima sa sunog sa Sitio San Vicente, Barangay Lahug nga tabangan niya kini pinaagi sa pagpakigtagbo niya sa iyang iyaan nga si Gobernador Gwendolyn Garcia aron mohangyo nga kuhaon sa siyudad ang maong luna aron magamit kini sa mga residente.

Matud ni Garcia nga ang maong luna nga giukopahan sa mga residente sa lugar iyaha kini sa Probinsiya sa Sugbo ug kinahanglan nga mangayo og pagtugot aron nga magamit kini sa siyudad.

Si Garcia nagkanayon nga personal niya nga hinabion ang gobernadora aron mas mapadali ang pag-atiman sa pakuha og solusyon sa maong problema tungod kay dili lang ang Barangay Lahug ang nakasinati og dakong sunog karong buwana lakip usab ang Barangay Mambaling.

Gawas sa iyang paghangyo ngadto sa gobernadora makigtagbo usab siya sa mga kadagkoan sa Department of Education aron nga mohatag kini og agianan alang sa mga tawo nga mamuyo sa maong dapit.

Si Garcia nagkanayon nga kong dili mosugot ang DepEd sa iyang hangyo nga maghimo og agianan sa maong luna nga mamahimong maagian matag adlaw sa mga residente iyaha lang kining hangyuon nga kong mamahimo paagian lang kini kong ugaling adunay emerhensiya nga motumaw.

Base sa report sa Cebu City Public Information Office nga gawas sa tabang sa pagsulbad sa maong yuta, gitunol na usab ang tabang pinansiyal nga P20,000 ngadto sa 44 ka pamilya nga tag-iya og balay lakip na ang 18 ka mga nangipon og balay.

 Ang 17 ka nag-abang nakadawat og P10,000 ug ang 23 ka lodger nakadawat og P5,000. (BANAT NEWS)