DOLE: Mga kompaniya walay safety officers

CEBU, Philippines — Gibutyag sa Department of Labor and Employment (DOLE)- 7 nga usa sa dakong hagit sa pagpasiugda sa workplace health and safety mao ang kakuwang o walay safety officers nga modumala sa kaayohan sa mga trabahante.

Kini maoy gituki ni Atty. Roy Buenafe, direktor sa DOLE-7 kauban ang ubang panelists nga sila si DOLE ug Occupational Safety and Health Center Executive Director Jose Maria Batino, Dr. Anna Sofia Fajardo, national president sa Philippine College of Occupational Medicine, Inc., (PCOM) ug PCOM Cebu Chapter President Michael Adonis Dumaguin atol sa pagsugod sa obserbasyon sa 3rd Occupational Medicine (OM) Week pinaagi sa Occupation al Safety and Health Center (OSHC) kagahapon. Matud ni Buenafe nga ang isyu sa kakuwang o kawalay safety officers maoy kasagarang violations sa mga kompaniya partikular na sa mga hazardous nga industriya sama sa construction. Si Buenafe nipadayag sa iyang kasagmuyo nga ang pipila ka safety officers napakyas sa pag-report sa mga aksidente sa trabahoan ngadto sa DOLE sulod sa 24 oras ilabi na ang mga insidente sa pagkamatay sa kawani. Samtang si Batino nagkanayon nga gawas sa kakuwang sa safety officers ang ubang mga kalapasan naglakip sa kawalay first aider ug ang dili pagsumite sa mga occupational safety reports sa mga kompaniya.

Sa iyang bahin, si Buenafe nagkanayon nga ang mga trabahante kanunay usab nga dili magsul-ob og personal protective equipment (PPE) sama sa mga harness, hard hat ug giingonh ang uban mosukol pa sa mga lakang sa kaluwasan kong badlongon. Samtang si Fajardo nitumbok nga ang pag-fill up sa mga posisyon sa safety officer nagpabiling lisod tungod sa limitado nga resources sa kompaniya lakip usab ang kakulang sa mga doktor nga nabansay sa occupational medicine nga nakaapekto sa mga paningkamot sa capacity-building. Ug aron matubag kini nga mga hagit ang DOLE nagpatuman og mga programa sama sa subsidized training for safety officers diin sa mga micro-enterprises naghatag ang gobiyerno og libre nga pagbansay aron matabangan ang mga establisamento sa pagsunod sa mga regulasyon sa kaluwasan. Ang maong safety trainings nga nagpalambo sa kaluwasan sa trabahoan naglakip sa Basic Occupational Safety and Health (BOSH) nga pagbansay alang sa Safety Officers 1 ug 2 diin alang sa construction sites gikinahanglan ang Construction Occupational Safety and Health (COSH) nga pagbansay nga naglangkub sa mga protocol sa kaluwasan nga specific sa industriya.

 Ang DOLE nipaila sa usa ka e-portal diin mas mapadali ang proseso sa pagsumite sa kompaniya sa ilang accident ug illness reports kauban ang uban pang mga occupational safety nga dokumento. BDB BANAT NEWS