Tulo ka "hubog" patay sa aksidente

Tulo ka tawo, ang duha niini managsuon ang nakalas sa human sila parehong nadisgrasya sa managlahing lugar niadtong Sabado, Marso 8,2025. Ang unang disgrasya nahitabo alas 4:47 sa hapon sa Sitio Balhaan, Barangay Madredijos, Lungsod sa Alegria.

Patay ang managsuon nga sila si Ronald Antipuesto, 46, nga maoy driver ug ang back rider niyang igsuon nga si Richard Antipuesto, parehong taga Sitio Highway 54, Poblacion sa Lungsod Badian.

Ang Alegria Municipal Police Station nakadawat og tawag labot sa nahitabong disgrasya sa motorsiklo sa maong dapit ug dali nila kining girespondehan.

Pag-abot sa lugar naabtan nila ang mga biktima nga naa na sa ubos kilid sa karsada nga giatiman sa mga rescuers sa Municipal Disaster Risk Reduction Management Office sa Alegria.

Sa inisyal nga imbestigasyon sa kapolisan, gikan pa sa buwangan sa Sangi, Barangay Madredijos, Alegria ang managsuon ug parehong nakainom ug gituohang mga hubog.

Padulong na sila manguli sa Lungsod sa Badian sakay og puti nga motorsiklo,  apan pag-abot sa nahitaboan wala nakaliko ang drayber ug nalahus sila sa ubos sa sementadong box culvert sa ubos.

Ang duha diretso og kahagsa sa ubos kauban ang ilang motorsiklo nga miresulta sa ilang naangkong mga kadaut sa kalawasan ug ulo.

Gidala pa ang mga biktima sa Badian District Hospital apan gideklarar silang dead-on-arrival.

Samtang alas 5:45 sa hapon sa samang adlaw, usa ka disgrasya sa motorsiklo ang nahitabo sa Barangay Matutinao, Lungsod sa Badian.

Patay ang driver sa motorsiklo nga si Dante Cui Caballero, taga Barangay Poblacion, Lungsod sa Badian.

Gamaneho kini og motorsiklo nga Yamaha NMAX color black.  Sa imbestigasyon sa Badian Municipal Police Station ang biktima gikan sa Lungsod sa Alegria paingon sa Barangay Poblacion, Lungsod sa Badian ug giingong hubog kini.

Pag-abot sa blind curve sa maong dapit gikataho nga nawagtangan kini og kontrol sa motor ug nabangga sa punoan sa lubi sa kilid sa karsada.

Nakaangkon ang biktima og grabeng kadaot sa lawas ug gidala kini sa Badian District Hospital apan gideklarar nga dead-on-arrival. — /IBM(BANAT NEWS)