Usa ka lane sa dalan sa Barangay Basak sa Mandaue isirado

CEBU, Philippines — Gipahibalo sa buhatan sa Traffic Enforcement Agency of Mandaue (TEAM) ang temporaryong pagsirado sa pikas lane sa dalan J. P. Rizal sa Barangay Basak, Siyudad sa Mandaue sugod karong Martes, Marso 4, 2025 tungod sa iptuman nga proyekto nga third phase sa drainage improvement sa maong dapit.

Si Hylle Retuya, pangulo sa TEAM nagkanayon nga ang siradohan nga bahin sa dalan mao ang eskina Consuelo Village diin ang pikas lane padulong sa amihanang bahin sa lalawigan ang igahin usab nga kaagian sa mga sakyanan nga mopaingon sa south nga bahin sa Sugbo.

Nunot sa maong kahimtang sa dalan giawhag ang mga apektadong motorista nga mangita og ilang kaugalingong pamaagi nga dili kaayo maepektohan ang matag adlaw nilang gimbuhaton sama sa sayo nga paggikan paingon sa ilang trabaho.

Matud Retuya nga tungod sa maong proyekto nga ipatuman ilang gilaoman nga masinati usab ang grabeng kahuot sa trapiko diha sa maong lugar. Hinuon si Retuya miingon nga nangita sila og alternatibong dalan nga kaagian sa mga sakyanan sama sa nagagikan sa norte ilang gitambag ang pagliko sa tuo sa H. Abellana sa eskina Canduman ug moliko sa wala sa dalan Suico.

Dugang ni Retuya nga ang mga sakyanan nga nagsubay sa dalan D.S. Suico adto kini moliko sa wala ug molahos sa P.L. Sanchez ug moliko sa tuo subay na sa dalan J.P. Rizal paingon sa Siyudad sa Sugbo. — /BDB (BANAT NEWS)