P1.2 milyones ayuda sa DOLE sa mga nawad-an ug trabaho

CEBU, Philippines — Nakadawat ang Cebu People’s Multipurpose Cooperative (CPMC) og kinatibuk-ang P1.2 milyones ka pesos gikan sa Department of Labor and Employment (DOLE) Region VII alang sa mga nawad-an og trabaho.

Ang CPMPC, nga mas giilang People's Coop, usa ka cooperative organization nga nakabase sa siyudad sa Sugbo ang nagtanyag ug naghimo og mga programa ug serbisyo nga nagtumong sa paghatag og tabang pinansyal ug nagpausbaw sa ekonomikanhong kalamboan sa mga miyembro niini, ilabina sa panahon sa panginahanglan ug krisis.

Ihatag sa kooperatiba ang P1.230 milyones ngadto sa 41 ka mga benepisyaryo, kadaghanan kanila mga displaced workers gikan sa mga locator sa Mactan Export Processing Zone.

Sumala sa DOLE VII, ang maong pundo gamiton sa mga benepisyaryo alang sa ilang mga gisugyot nga proyekto sama sa tailoring o sewing, pagbuhi/pagpatambok og baboy, pag-operate og carenderia, pagpadagan og upholstery shop, rice retailing, ug sari-sari store.

Kini nga mga proyekto giaprobahan na usab sa regional review committee sa ahensya.

Ang mga benepisyaryo sa amihanang Sugbo gikan sa Bogo, Danao, Consolacion, Catmon, Carmen, Borbon, Tabuelan, Liloan, ug San Remegio.

Samtang ang gikan sa habagatan ug kasadpang bahin sa Sugbo gikan sa Toledo, Naga, Pinamungajan, Dalaguete, Asturias, Alcantara, Barili, Balamban, Carcar, ug Argao. Dugang pa sa DOLE VII, nga kining mga pundo gihatag pinaagi sa Integrated Livelihood Program (DILP) ubos sa departamento, nga usa ka mahinungdanong bahin sa poverty reduction initiatives nga nagtumong sa pagpalambo sa inclusive economic development. (BANAT NEWS)