Nganong kapkapan, ablihan ang U-Box?

CEBU, Philippines — Nunot sa mga reklamo nganong dili apilon og para ug inspeksyon ang mga four-wheeled vehicles sa mga checkpoints, ang Highway Patrol Group miklaro nga ang mga  motorsiklo maoy sagad parahon tungod sa pagpatuman sa “plain view doctrine.” Usa ka executive session ang gihimo sa konseho aron hisgotan ang klaro nga mga guidelines sa mga checkpoints kaniadtong Miyerkules.

 Kini nunot sa privilege speech ni Konsehal Pastor “Jun” Alcover diin iyang gipaabot ang mga reklamo nga nadawat sa iyang buhatan, partikular na sa nagkadaiyang organisasyon sa mga motorcycle riders.

Ang Highway Patrol Group (HPG)-7, pinaagi sa ilang representante nga si Police Captain Clifton Gairanod, Chief Officer sa Cebu City HPG miingon nga ang mga checkpoints “strategically located” isip mga lakang aron mapugngan ang kriminalidad.

Si Alcover nangayo og katin-awan nganong ang mga nagsakay og sakyanan dili pakanaugon unya ang mga mag-motor pakanaugon ug paablihan ilang utility box nga dili na sakop sa “plain view doctrine.”

Apan si Gairanod miinsister nga nananghid sila sa mga riders, gihangyo nga manaug tungod kay ang ilang mga lisensya naa sa sulod sa ilang mga utility box.

“Dili kami ang nagpakanaog sa mga motorista, sila mismo ang ninaog,” pangangkon pa ni Gairanod. Apan dili kini maoy nahitabo sa ubang police checkpoints, ang lisensiya sa drayber naa ra sa iyang bag, apan pakanaogon gihapon ug gipaablihan ang U-box aron inspeksyonon.

Matud niya, ang sagad nga kalapasan nga makita ubos “plain view doctrine” maoy rason nganong parahon ang mga nagmotor sama sa wala paggamit og helmet  nga kinahanglana sa mga sakay og four-wheeled vehicles. Gawas pa niana, makaduda ang ubang nagmotor kay molikay sa checkpoint.

 “Motor sad kasagaran ang mostly gamit sa mga riding-in-tandem and kawat, mostly ang mga kawatan di man na mogamit og four wheels kung mangawat,” matud ni Gairanod. Atol sa diskusyon, niatubang sa konseho si Jovanni Lumayno, representante sa Habal-Habal Association sa dakbayan sa Sugbo.

Si Lumayno niingon nga sa usa ka gabii, tulo ka mga checkpoints ang iyang masugatan ug tanan mopahunong gyud niya ug mangita sa iyang ID ug lisensiya.

Apan siya miingon nga bisan sa una pa sa wala pa ang election period, ingon ana na gyud ang tratamento kanilang mga nagmotor diha sa mga checkpoints, sila ray parahon.

Dugang pa niya nga personal niyang nasaksihan ang laing rider nga gi-body search hinungdan nga naglibog siya tungod kay wala sila pahibaw-a nga ang mga ingon ani apil sa checkpoints. Gihisgotan usab niya nga adunay uban nga sugoon sa polis nga paablihan ilang mga utility boxes.

Matud pa niya, ang mga miyembro sa ilang kapunongan wala gyud nasayod unsay sakto ug legal nga guidelines o pamaagi diha sa checkpoints. IBM BANAT NEWS