“Nangulatang” mga polis gidisarmahan, girelibohan

CEBU, Philippines — Girelibuhan na ang duha ka polis sa Toledo City Police Station nga gilambigit sa nahitabo sa usa ka 59-anyos nga libud-suroy nga giingong namatay sa pagpangulata niadtong Agosto 26, 2025.

Nagkanayon si Police Captain Dun Blane Tabares, tigpamaba sa Cebu Police Provincial Office (CPPO) nga ang duha giimbestigaran na nila bahin sa maong insidente.

Gipaubos sab ang duha sa restrictive custody sa Personnel Holding and Accounting Section sa CPPO ug gipauli ang ilang mga service firearms.

Una niini, ang NBI-CEVRO mihimo og imbestigasyon kalabot sa kamatayon ni Eliseo Rosento kinsa namatay niadtong August 26, 2024.

Niadtong Martes gipahibaw sa NBI CEVRO nga ang pamilya sa biktima nidangop sa ilang buhatan niadtong Septiyembre sa miaging tuig pipila ka adlaw human namatay ang ilang igsuon.

Sa unang report gikan sa Toledo City Police Station, napalgan lang sa mga nagpatrolyang polis si Rosento nga walay panimuot ug nagkadugo niadtong Agusto 26, 2024. Gibutang sab sa report nga nagduda sila nga nahulog kini. Apan di kombinsido ang pamilya hinungdan nga nagpatabang sila sa NBI, ug sa mga imbestigasyon nga gihimo ug resulta sa autopsy nasuta nga wala motakdo sa ‘pagkahulog’ ang kadaut nga naangkon sa kalawasan sa namatay kondili gikan ‘blunt trauma.’

Duna say nakuhang mga testigos ang NBI nga nakakita sa aktwal nga pagkulata sa maong duha ka polis ngadto sa biktima nga ilang gibuhat sa sulod mismo sa patrolcar diha sa atubangan sa usa ka gasolinahan ug sa sementeryo nianang gabhiuna. Gikataho nga gihagbong lang ang lawas niini gikan sa sakyanan.

Kasong murder ang ilang gipasaka batok sa duha ka pulis ngadto sa Ombudsman, kay ang krmen matud pa nahitabo samtang nag-duty ang duha.   IBM BANAT NEWS