Oplan Baklas sa Comelec nagpadayon sa siyudad sa Mandaue  

CEBU, Philippines — Nagpadayon ang Oplan Baklas campaign sa Commission on Election (Comelec) sa siyudad sa Mandaue diin ang mga dagkong dalan sa dakbayan ang giuna sa pagsuroy sa mga sakop sa comelec.

Suma pa ni Jaquelin Reuyan, Comelec Officer sa siyudad nga ang ilang gitangtang nga mga campaign posters sa national nga kandidato mao lamang kadtong ilegal nga gipamutang sama sa poste sa VECO, gibitay sa mga kahoy ug kadtong gibutang sa publikong lugar nga wala malakip sa ilang giila nga common poster area.

Apan kadtong campaign posters nga gibutang sa pribadong lugar nga adunay pagtugot sa tag-iya ang wala nila malakip sa pagtangtang.

Giklaro ni Reuyan nga ang mga common poster area anaa sa plaza, barangay hall, gym o mga publikong luna nga lakip sa ilang giila nga common poster area.

Unya sa Pebrero 28, nga mao usab ang pagsugod sa 45 days nga pagpangampanya sa mga lokal nga kandidato laing Oplan Baklas ang ilang ilusad.

Ang Comelec subling nipahinumdum sa mga kandidato nga dili magpataka og pamutang sa ilang mga campaign posters ug motuman lang sa balaud.

Si Omar Shariff Mamalinta election officer sa siyudad sa Carcar nipadayag usab nga kinahanglan nga magmatngon usab ang mga kandidato sa gidak-on sa ilang mga campaign material aron dili ma problema.

Giawhag ni Mamalinta, ang mga kandidato nga sundon lang ang fair elections act aron walay mga kalapasan nga atubangon. (BANAT NEWS)