Garcia natagbaw sa performance sa director sa CCPO
CEBU, Philippines — Natagbaw ra si Cebu City Mayor Mayor Raymond Alvin Garcia sa performance sa kasamtangan nga City Director sa Cebu City Police Office nga si P/Col. Enrico Figueroa.
Gipadayag kini sa mayor atol sa Command Conference sa CCPO nga iyang gitambongan kagahapon sa buntag, Pebrero 11, 2025.
Nipahimangno hinoon si Garcia nga padayon nga ipatuman sa kapolisan ang police visibility ug siya nalipay nga makita ang kapolisan diha sa kadalanan. Si Figueroa nipasalig nga makita kanunay sa publiko ang kapolisan diha sa kadalanan ug duna nay mga pulis sa mga outpost nga gipakatap sa dakbayan.
Nipasalig usab si Garcia nga mohatag og dugang mga patrol car ug uban pang gikinahanglan sa CCPO.
Gipahinumdoman sab niya ang kapolisan kabahin sa dali nga pagtubag sa mga alarma isip kabahin sa dinaliang pagsulbad sa krimen. Subli sab nga gipasalamatan sa mayor si Figueroa ug iyang mga sakop tungod sa malampuson ug malinawon nga pagsaulog sa Sinulog 2025.
Sa laing bahin, gipahibawo ni Mayor Garcia nga karon nang Pebrero 20, 2025 ipahigayon ang groundbreaking sa tulo ka andana nga CCPO headquarters nga gipundohan sa siyudad og P50 milyones. (BANAT NEWS)
- Latest
