CPPO: Walay kamatuoran ang kidnapping
CEBU, Philippines — Giklaro sa Cebu Police Provincial Office (CPPO) nga walay kamatuoran ang mga report mahitungod sa kidnapping sa pipila ka lugar sa Probinsiya sa Sugbo.
Sayo pa, adunay mga post diha sa social media kabahin sa insidente sa kidnapping sa Lungsod sa San Fernando, Dakbayan sa Toledo ug Dakbayan sa Talisay sa niaging semana.
Nunot niini, si Police Captain Dun Blane Tabares, tigpamaba sa CPPO nihatag og katin-awan nga walay kamatuoran ang maong insidente.
Kini subay sa gihimong imbestigasyon sa CPPO diin apil niini ang pag-review sa mga CCTV footage, pagpahigayon og interview sa mga saksi ug pag-verify sa mga report diin walay kompirmadong insidente sa kidnapping ang natala diha sa maong mga lugar.
Giawhag nila ang publiko nga magbinantayon ug mahimong resposable sa pag-share og impromasyon diha sa online.
"Unverified claims can cause unnecessary panic and fear in our communities", matud ni Tabares.
Nanawagan usab sila sa mga vlogger ug content creators nga kinahanglang responsable sa mga content nga ilang himuon.
"CPPO remains committed to ensure public safety and to encourages everyone to report any suspicious activity directly to the police", dugang ni Tabares. (BANAT NEWS)
- Latest
