Solidarity Pact Signing gihimo sa mga ahensya sa gobyerno

CEBU, Philippines — Gipahigayon kagahapon sa nagkadaiyang ahensiya sa gobyerno pinangulohan sa Commission on Election (COMELEC) region seven ang Solidarity Pact Signing alang sa 2025 National ug Local Election ug Bangsamoro Autonomous Region in Muslim Mindanao Parliamentary Election diha sa Police Regional Office-7 Parade Ground, Camp Sergio Osmeña dakbayan sa Sugbo.

Ang kalihukan gitambungan sa Philippine National Police, Department of Education, Department of Interior and Local Government, Department of Health, Philippine Information Agency, COMELEC, Bureau of Fire Protection, Armed Force of the Philippines, Bureau of Jail Management and Penology, Philippine Coast Guard, Department of Information and Communications Technology, CCPO Coalition of Force Multipliers ug RAGPTD.

Ang kadagkuan sa maong mga ahensiya sa gobyerno mipirma sa solidarity pledge.

Gipasalig sa nagkadaiyang ahensiya sa gobyerno ang ilang kaandam ug suporta aron hapsay ug malinawon nga mapahigayon ang umaabot nga piniliay.

Si PRO-7 Regional Director Brigadier General Redrico Maranan mipasalig nga tanang pwersa sa kapolisan sa Central Visayas gamiton apil na sab ang ilahang resources aron gawasnon nga makabotar ug makapili ang katawhan og mga bag-ong lider sa nasud.

Si COMELEC-7 Regional Director Atty. Francisco Pobe mibutyag ang Solidarity Pact Signing nagpakita sa panaghiusa sa mga ahensiya sa gobyerno alang sa malinawon ug malampuson nga eleksyon.

Subay na sa pagpangandam sa umaabot nga eleksyon nasayran nga 33 ka lugar sa Central Visayas ang gitan-aw sa PRO-7 ug COMELEC nga areas of concern subay na sab sa mga election related incidents kaniadto.

Base sa listahan sa PNP ug sa Comelec dunay usa ang giila nga Red category nga nag pasabot dunay presensya sa armadong grupo sama sa New Peoples` Army ug Private Armed Groups apan wala na mobutyag si Maranan kun asa.

Gipasalig ni Brigadier General Maranan nga ang kapolisan sa Central Visayas dili modapig ni bisan kinsa nga kandidato. (BANAT NEWS)