Restauro nipahimangno sa mga motel sa Talisay

CEBU, Philippines — Gipahimangnoan sa kagamhanan sa Dakbayan sa Talisay ang mga motel nga dili pasudlon ang mga menor de edad sa ilang establisamento.

Si Konsehal Gail Restauro, chairman sa committee on peace and order nagkanayon nga iyang gipakig-estoryahan ang hepe sa kapolisan sa siyduad aron mao kini ang mopahimangno sa mga motel nga nag-operate sa Dakbayan sa Talisay.

Matud ni Restauro nga iyahang gipasabot kadtong mga motel nga nitanyag og short time diin nanagana lang siya tungod kay saulogan na ang adlaw sa mga kasing-kasing karong Biyernes.

Nagtuo si Restauro nga ang matag motel adunay mga polisiya alang sa ilang mga kustomer ilabi na sa pagdili sa mga menor de edad ug nanghinaot siya nga gisunod ang maong polisiya.

Si Restauro nagkanayon nga ang kabataan nagkinahanglan kini og giya ug dili siya motugot nga mitumpawak sila ngadto sa kalaotan.

Nihangyo usab si Restauro sa mga ginikanan nga i-monitor ang ilang mga anak kong unsa man ang mga lakaw niini. (BANAT NEWS)