Bag-ong testing center sa PRC dinhi sa siyudad giinagurahan
CEBU, Philippines — Giinagurahan sa Professional Regulation Commission Central Visayas ang ilang bag-ong facility nga mao ang Computer-Based Licensure Examination ug regular testing center nga nahimutang sa GMC Plaza, MJ Cuenco Avenue, Legaspi Exit, Cebu City, duol sa Plaza Independencia.
Ang maong facility adunay 282 ka mga laptops nga nagtugot sa susama ra usab nga gidaghanon sa mokuha ug exams.
Naghatag kini og kasayon sa mga mokuha ug licensure examination nga dili lang taga Sugbo apan lakip sa mga silingan nga probinsya.
Nangulo sa maong kalihukan ang rehiyonal nga director sa PRC-7 Narcival Taquiqui ug PRC Commissioner Atty. Erwin Enad.
Karong adlawa, Martes ang unang mogamit sa maong facility mao ang mokuha sa Respiratory Theraphy Licensure Examinations nga himoon kini nationwide.
Matud pa ni Taquiqui, tanan nilang himoon nga licensure examinations ilaha kining gipakig-alayonan sa Visayan Electric aron masiguro nga walay aberya ug kung dili malikayan aduna usab silay standby nga generator.
Dugang pa niya nga susama sa eleksyon kung unsa oras magsugod ang exams dungan kini tanan ug kung unsa oras mahuman mao usab kini ang takna nga mo shutdown ang computer.
Si Atty. Enad sa iyang bahin nibutyag nga kadtong mokuha ug license exams nga dili makakuha ug slots sa Cebu mahimo ra silang mokuha sa ubang dapit o kaha sa kaulohan.
Gipadayag ni Enad, ning pagpahigayon sa CBLE usa kini ka lakang sa pagpalambo sa examination process human ang PRC nagpahigayon usab ug transition gikan sa papel ngadto na sa digital assessments.
Sa pagkakaron gitutukan sa maong facility ang gagmay lang usa nga gidaghanon sa mga mokuha ug exams sama sa Librarians, Optometrists, Naval architects, Chemists, Speech-language pathologists, Dental hygienists, Psychologists ug uban pa diin moabot ngadto sa 16 ka mga professions.
Malaumon usab ang PRC nga sa umaabot nga katuigan makahimo na sila pagdawat na unya sa dinaghan nga mokuha ug exams sama sa teacher, criminologist ug uban pa. (BANAT NEWS)
- Latest
