Sugboanon Channel nihunong na sa operasyon

CEBU, Philippines — Ang broadcasting arm nga Sugboanon Channel nga gitukod ubos sa pamunoan ni kanhi mayor Michael Rama nihunong na sa ilang operasyon apan nipasalig nga walay resources nga nausik.

Kagahapon, ang Sugboanon Channel Facebook page nipahibawo nga “signing off” na kini ug niawhag sa mga follower nga mobalhin sa pagtutok ngadto sa page sa Cebu City Public Information Office.

Sa usa ka mensahe ngadto sa The Freeman (igsuon publication sa Banat News), ang outgoing operations head niini nga si Cerwin Eviota nikompirma nga wala na ang Sugboanon Channel.

Samtang si Rama nagkanayon nga dili na siya mokomentaryo sa channel nga wala na siya gi-interview.

Sa wala pa siya masuspenso ug matangtang  isip mayor sa Siyudad sa Sugbo, si Rama adunay regular nga programa sa maong page nga giulohan og "Ingna'ng Mayor."

Matud ni Eviota nga ang maong channel gi-dissolve ni Cebu City Mayor Raymond Alvin Garcia ug i-merge sa PIO.

 Ug ang pangulo sa PIO nga si Ramil Ayuman gusto nga usahon ang duha ka page aron mausa usab ang identity.

Apan bisan pa sa pagwagtang sa channel gipasalig ni Eviota nga walay mga resources nga nausik tungod kay ang siyudad ang tag-iya sa kadaghanan sa mga kagamitan ug ang vital nga ekipo gipahulam sa pribadong sektor.

Gipadayag ni Eviota nga gipasalig nga ang PIO mag-maximize sa mga ekipo ug nisalig siya sa desisyon ni Ayuman kinsa iyang gihulagway nga usa ka beterano sa media ug usa ka lider nga adunay mas maayong opinion sa aspeto sa pagsibya.

Sa walo ka miyembro, tulo ang mobalik sa PIO, tulo ang nipili nga dili na mo-renew sa ilang mga kontrata ug nihunong na sa panarbaho sa kagamhanan sa siyudad ug usa ang gi-transfer sa laing buhatan.

Ang opisina ug studio sa Sugboanon Channel nga nahimutang sa Satellite Office sa Cebu City Hall atbang sa main office mao nay magsilbi nga main office sa PIO.

Si Eviota nagkanayon nga moalagad gihapon siya sa siyudad.

Ang Sugboanon Channel kabahin sa People’s Progressive Radio Media Network (PPRMN) nga usa ka digital platform nga gipundohan sa publiko nga naglihok nga independente sa Cebu City PIO.

Ang opisyal nga Facebook page gihimo kaniadtong Agosto 1, 2023 ug paglabay sa duha ka semana opisyal nga gilusad ang channel.

Matud usab ni Eviota nga ang pag-develop sa konsepto nagsugod niadtong Enero 2023 human gibalhin ang mga tahas niya gikan sa pagka-PIO ngadto sa special assistant to the mayor for communication. (BANAT NEWS)