Pagmugna sa ccdrrmc dili mosapaw sa tahas sa CCDRRMO

CEBU, Philippines — Sa katukuran sa bag-ong Disaster Risk Reduction and Management Council gipasalig sa chairman niini nga si Ramil Ayuman nga way mahitabo nga overlapping sa functions niini sa hepe sa city disaster nga si Aderson Comar.

Gipasabot ni Ayuman dihang nahinabi sa The Freeman nga ang Cebu City Disaster Risk Reduction and Management Council (CCDRRMC) maoy responsable sa disaster preparedness, response, mitigation, and recovery efforts sulod sa Cebu City. Samtang ang council maoy tahasan sa policy-making ug monitoring sa functions sa disaster office, apil na ang pag supervise, pagkig-alayon sa ubang government agencies.

Ang CCDRMO, maoy magsilbing implementing body sa mga polisiya nga gitakda sa Office of the Mayor ug CCDRRMC ug dunay action team sa disaster response.

Si Ayuman maoy gihulip ni City Councilor Joel Garganera sa maong pwesto isip dugang sa iyang function isip pangu sa Cebu City PIO.

Gipaabot nga ang nahimong kasinatian ni Ayuman isip kanhi pangu sa CCDRMO ingon man isip undersecretary sa Department of Social Welfare and Development magamit kaayo sa paghimo og policy directions nga gitinguha sa council.

Sa iyang pagtubag sa bag-ong responsiblidad, gipatawag gilayon ni Ayuman ang ubang miyembro sa council alang sa usa ka tigum.

Nanghinaut si Ayuman nga makabaton og maayo nga pagtrabaho ug teamwork ngadto sa iyang mga kaubanan ilabina na sa CCDRRMO.

Ang council gikatakda nga mohimo og laing meeting sunod semana aron mag-review sa mga palisiya ug mosusi sa data record sa mga nangagi nga disaster incidents sa siyudad ug kun unsaon sa pagpalambo ang pagtubag sa mga emerhensya ug kalamidad. (BANAT NEWS)