Luna sa probinsiya sa brgy Sudlon ipagamit sa DOE
CEBU, Philippines — Ipagamit sa Probinsya sa Sugbo ang luna niini ngadto sa Department of Energy (DOE) sa barangay Sudlon, dakbayan sa Sugbo.
Ang hunta probinsyal mihatag og pagtugot kang Gobernador Gwendolyn Garcia nga mosulod og deed of usufruct o kasabotan tali sa DOE alang sa pagpahulam sa maong luna.
Ang Kapitolyo adunay 1, 504 metro kwadrado nga luna nga kabahin sa Lot. 1060 Banilad Estate sa Doña Modesta Gaisano St., Barangay Sudlon, ubos sa pangalan sa Probinsya.
Ang DOE mipahibalo sa Kapitolyo pinaagi sa usa ka sulat niadto pang Disyembre 2023 nga nanginahanglan kini og area o luna alang sa sunod nga site sa ilang opisina.
Ang Probinsya sa Sugbo miuyon sab sa hangyo sa DOE ug nagkanayon nga ipagamit niini ang bakante nga luna ngadto sa DOE sulod sa 25 ka tuig, ug mamahimong ma renew depende sa tag-iya o sa Probinsya. (BANAT NEWS)
- Latest
