Local OSAEC ordinance gihangop

CEBU, Philippines — Giduso sa Cebu City Council ang pagpalabang og localized ordinance tungod sa makapaalarma nga mga kaso sa Online Sexual Abuse and Exploitation of Children (OSAEC) aron epektibong masumpo ug mapugngan ang maong krimen nga target ang mga bata.

Atol sa usa ka public hearing nga gihimo sa konseho, gihisgutan ang ordinansahon ni Konsehal James Anthony Cuenco nga matud niya subay sa memorandum gikan sa Department of the Interior and Local Government (DILG), nga nagmando sa mga LGUs sa pag-integrate sa Expanded Anti-Trafficking in Persons Act ngadto sa ilang lokal nga mga ordinansa.

Nag-ulohan kini og "An Ordinance Prohibiting Online Sexual Abuse and Exploitation of Children (OSAEC) and Child Sexual Abuse or Exploitation Materials (SAEM) in the City of Cebu, Institutionalizing Programs for Its Prevention and Eradication, Providing Penalties Thereof, and Establishing a Supportive Environment for Child Victims, and Providing Funds Therefor."

Atol sa public hearing, ang mga advocates ug officials nipadayag sa ilang suporta batok online child exploitation sa siyudad.

Si Lucille Garcia Dejito, director sa International Justice Mission Cebu Program Office, nibutyag nga base sa ilang pagtuon niadtong 2023, sa top 20 ka mga lungsod ug dakbayan sa tibuok nasud, ang Cebu City ika-upat sa hotspot sa maong krimen.

Dugang pa niya nga dul-an sa tunga sa milyon ka batang Pilipino ang biktima sa online exploitation, apan, bisan pa sa mga paningkamot sa pagpatuman sa balaod, 1,400 ra nila ang mga naluwas. Mao nga si Dejito miingon nga kinahanglang palig-onon ang community-level efforts, paghatag og mga resources alang sa multidisciplinary response teams, ug pag-train sa mga frontline personnel.

Sumala usab sa pagtuon, daghan sa mga kaso sa OSAEC ang wala gyud ma-report sa mga otoridad.  Sa 2024 nga report sa Anti-Money Laundering Council gitumbok nga ang Cebu City usa sa mga nag-unang siyudad nga adunay nabantayang mga kadudahang pinansyal nga transaksyon pinaagi sa mga bank transfers o online cash transaction nga gidudahang naglambigit sa child exploitation.

Si Konsehal Joel Garganera mibasol sa kakabos maoy hinungdan niini,  gani dunay mga ginikanan nga gipangunayan ang pagbugaw sa ilang mga anak ngadto sa online exploitation aron makakwarta.

Gisugyot niya karon nga subayon kining mga kadudahang financial transactions aron mabungkag ang mga network nga nakakwarta gikan sa child exploitation.

Si Konsehal James Cuenco kinsa nihulagway sa sitwasyon nga makaalarma na kaayo. Matud niya kinahanglang dunay mas maayong mekanismo sa  reporting ug trauma support services alang sa mga survivors nga maoy gilatid sa maong ordinansahon.

Sa laing bahin, si Atty. Marygrace Casano, nga nagrepresentar sa Integrated Bar of the Philippines Cebu City Chapter ug sa Cebu Lady Lawyers Association nihangop sa lokal nga ordinansa bisan pa man nga dunay nasudnong balaod batok sa OSAEC.

"The local action of city would build the walls of protection. We cannot dismiss the need for a city ordinance on OSAEC because by ignoring it, we ignore the fact that enforcement, victim support, and community prevention should not be at the national level, but at the local level. Indeed the national laws exist but without our local implementation they remain to be words on paper," matud niya.

Ang mga nanambong sa public hearing nagpasalamat sa Sangguniang Panlungsod sa pagsugyot niining ordinansahon nga manalipod sa mga kabataan sa dakbayan. IBM BANAT NEWS