Namaligya og pre-registered sim cards sikop

CEBU, Philippines — Duha ka tawo nga giingong namaligya og pre-registered sim cards ang nasikop sa PNP Anti-Cybercrime Group Regional Anti-Cybercrime Unit-7 Negros Oriental uban sa Bacong Municipal Police Station atol sa entrapment operation nga gihimo didto sa Barangay Banilad, Bacong Negros Oriental niadtong Huwebes.

Ang mga suspetsado nga babaye ug lalaki giingong nakalapas sa Akta Republika 11934 kun “Sim Registration Act” in relation to section 6 sa Akta Republika 10175 kun “Cybercrime Prevention Act of  2012”. Ang mga suspetsado naaktohan kini atol sa gipahigayong cybercrime patrolling sa cybercrime investigators nga namaligya og pre-registered sim cards sa market place.

Nasakmit sa kapolisan gikan sa mga suspetsado ang 10 ka sim cards.

Si Police Colonel Lemuel Gonda, hepe sa PNP ACG-RACU-7 nidayeg sa kalamposan sa iyang mga sakop uban sa pakig-alayon nila sa mga nagkadaiyang ahensiya ug komunidad. BDB BANAT NEWS