Kapolisan gipaubos sa kinalit nga drug test

CEBU, Philippines — Gipaubos sa kinalit nga drug test ang kapolisan sa Dakbayan sa Talisay niadtong miaging adlaw.

Kini aron masiguro nga limpyo sa ilegal nga drugas ang tigpatuman sa balaod.

Si Police Lt. Col. Epream Paguyod, hepe sa kapolisan nipatawag sa iyang mga sakop aron magtigom. Pagkahuman sa iyang mensahe misulod dayon sa ilang buhatan ang forensic team aron mangolekta sa ihi sa mga polis.

Miabot sa 90 ka mga polis ug unom ka mga non-uniformed personnel o NUP ang napaubos sa kinalit nga drug test.

Nagkanayon si Paguyod nga kun mahimo himuon nila kini katulo sa usa ka tuig aron maklaro gyud nga ang kapolisan wala malambigit sa illegal nga drugas.

Ang magpositibo sa paggamit og illegal nga drugas posible nga mataktak gyud kini sa katungdanan.(BANAT NEWS)