Lalake gidunggab sa silingan kay gihimong hayhayan ang agianan

CEBU, Philippines — Samdan sa iyang dughan ang usa ka 42-anyos nga lalake human kini gidunggab sa iyang 53-anyos nga silingan sa sitio Kalubihan, Barangay Talamban, siyudad sa Sugbo, kagahapon sa buntag, Huwebes, Pebrero 6, 2025.

Ang biktima mao si Edwin Ardiente Bongo, samtang ang suspect mao si Isagani Delima Aranita, ang duha pulos residente sa naasoy nga lugar.

Matud ni Police Major Alvino Enguito, Hepe sa Talamban Police Station 8 Cebu City Police Office nga ang biktima ug suspect nagkalalis ug ang rason sa ilang lalis mao nga nasuko ang suspect nga gihimong hayhayan sa biktima ang ilang road right of way.

Giingong hubog ang suspetsado dihang nagkalalis ang duha nga misangpot sa pagpanunggab.

Kitchen knife nga dunay gitas-on nga 5-inches ang gigamit matod pa sa suspect sa pagdunggab sa biktima sa dughan.

Hinoon, nadakpan ang suspect nga karon nagtingkagol na sa prisuhan ug gikatakda kining pasakaan og kasong frustrated murder. (BANAT NEWS)