Top Most Wanted nga hitman sa Leyte nadakpan sa Liloan

CEBU, Philippines — Nadakpan sa hiniusang pwersa sa mga sakop sa Liloan Municipal Police Station, Provincial Intelligence Unit Cebu Police Provincial Office, SWAT 1st PMFC, RIU PRO-7 ug intelligence operatives sa PRO-7 ang top wanted person sa Eastern Visayas niadtong Pebrero 5, 2025 sa Purok Kawayanan, Barangay Tayud, Lungsod sa Liloan.

Ang suspetsado mao si alyas Nic, 27, nagpuyo sa Tabango, Leyte ug giingong iladong miyembro sa gun-for-hire group nga nag-operate sa 3rd ug 4th district sa Leyte.

Nadakpan ang suspetsado pinasikas sa multiple warrants of arrest sa mga kasong three counts of murder ug wala'y piyansa nga girekomendar; kalapasan sa Section 11(3) ug 12, Article II sa Republic Act 9165 ug dunay girekomendar nga piyansa nga P200,000; ug kalapasan sa Section 28(A) in relation to Section 28(E) sa Republic Act 10591.

Ang akusado gilambigit sa duha ka managlahi pagpamusil sa Barangay Casilion, Villaba, Leyte niadtong December 11, 2023 nga miresulta sa kamatayon sa kanhi barangay kagawad ug sa 7-anyos nga anak niini sa Sitio Banahaw, Barangay Tugas, Tabango, Leyte pagka Pebrero 20, 2024. Ang biktima barangay kagawad sa Barangay Sta. Rosa, Tabango, Leyte. (BANAT NEWS)