Budget sa mga programa gilaslasan aron ma-exempt si Garcia sa ban

CEBU, Philippines — Giaprobahan sa Konseho sa Dakbayan sa Sugbo ang resolusyon nga magtugot kang Mayor Raymond Alvin N. Garcia aron mahatagan og exemptions gikan sa lagda sa Commission on Elections (COMELEC) nga nagdili sa pag-release, pag-disburse, o paggasto sa public funds sulod sa election period.

Subay sa resolusyon nga giluwat ni Konsehal Rey Gealon, siya miingon nga kinahanglang exempted ang mayor niini aron di mahunong ang operasyon sa mga serbisyo sa siyudad.

Kahinumdoman nga sa nilabay nga sesyon wala naaprubahi ang gipangayong exemption sa mayor tungod kay dunay mga kulang sa mga detalye sama sa tumong, eskedyul sa pagputaman ug pagbutang sa insaktong kantidad, sumala sa The Freeman.

Atol sa regular nga sesyon niadtong Pebrero 5, gipresentar pagbalik ni Gealon ang maong resolusyon ug gi-attach na ang mga detalye nga gipangayo sa konseho.

Sa sinugdanan gikuwestiyon sa mga miyembro sa konseho ang pipila ka mga items nga giapil sa gahinan og pundo. Pagkahuman sa taas nga diskusyon, ang konseho, partikular na si Konsehal Jocelyn Pesquera, misugyot nga amendahan ang pipila niini usa ba aprobahan.

"I have noticed that the period implemented is only for March 28 to May 12, 2025 but the ammount of disbursement indicated is already the budget for entire year. That’s why I would like to propose an ammendment to each and every item so that the ammount will just be enough for the period mentioned," padayag ni Pesquera.

Sa 133 ka mga items, 30 ka mga items ang gilaslasan og pundo ug 10 ang gipangtangtang gyud kay dili kini angayang buhaton ug dili pa kinahanglanon sulod sa maong timeframe.  Ang mga social welfare ug services projects nga gilaslasan og pundo mao ang Assistance to Individuals in Crisis Situation (AICS) nga programa sa Department of Social Welfare and Services, nga mikunhod nalang ngadto sa P5 milyones gikan sa orihinal nga P20 milyones; Self Employment Assistance Program nga P2 milyones nalang gikan sa P7 milyones; pinansiyal nga tabang alang sa mga biktima og sunog, nga gikan sa P199 milyones nabinlan nalang og P10 milyones.

Samtang, ang pondo alang sa pinansiyal nga suporta sa Persons with Disabilities nalaslasan usab gikan sa P184 milyones nahimong P30 milyones; ang ayuda alang sa mga octogenarian, nonagenarian, ug centenarian nahimong P5 milyones gikan sa P20 milyones; ang social pension mikunhod ngadto sa P10 milyones gikan sa P49 milyones; ang burial assistance nahimong P6 milyones nalang gikan sa kapin P14 milyones; ang budget alang sa tuition sa college scholarship program naminusan og dako, gikan sa P142 milyones nahimong P70 milyones.

Dugang pa, ang cash assistance alang sa mga mag-uuma nahulog nalang sa P5 milyones gikan sa halos P15 milyones; ang pondo sa City Hospitalization and Medicines Program, apil ang sweldo sa mga job order nga kawani, naapektuhan usab og dakong pagkunhod, gikan sa P400 milyones nahimong P50 milyones; ang pondo alang sa health card naminusan ngadto sa P1 milyon gikan sa P4 milyones; ug ang ayuda alang sa mga senior citizen mikunhod nalang sa P100 milyones gikan sa P279 milyones.

Gipatangtang sab ang Cebu City Wi-Fi Project ug ang pag-instalar sa fiber loop; pagpalit og branded intelligent hub ug desktop; ug ang pagpalit pump boat para sa Bantay Dagat.

Lakip usab ang pagpalit sa SRP Management Board og mga tractor, heavy equipment, ug generator, pundo sa pagbiyahe sa mga kawani sa Guba Community Hospital, Cebu City Medical Center, ug City Council for the Welfare and Protection of Children; pagpalit og Infectious Waste Machine; ug P30 milyones alang sa Robotics Educational Special Program. (BANAT NEWS)