Mga campaign posters sa mga tanom ipatangtang

CEBU, Philippines — Gihangyo sa Konseho sa dakbayan sa Sugbo ang Cebu City Environment and Natural Resources Office (CCENRO) nga tangtangon ang mga election materials nga gipamilit ug gipanglansang sa mga kahoy nga nahimutang sa daplin sa dalan ug sa ubang pampublikong lugar nga dili butanganan og political posters.

Atol sa usa ka regular nga sesyon, gitumbok ni Konsehal Pastor Alcover, Jr. sa iyang privilege speech nga iyang nabantayan nga daghan na ang mga election materials sama sa tarpaulin ug posters nga gipamilit ug gilansang sa mga kahoy.

Matud niya dili gyud unta kini buhaton tungod lang ka eleksyon kay makadaut sa kalikupan ug dili subay sa balaod.

"Kung makasulti palang ang kahoy tingali'g mosinggit nani siya o tingali'g mohilak nani siya tungod sa gihimo sa ubang mga politiko nga wa magtan-aw sa atoang environment," matud ni Alcover.

"I appeal to my co-candiddates that we should remind our campaign personnel not to put election materials on trees or any other prohibited areas. Let us lead by example, let us show the people that we care for the environment. Let us be examples of being law abidding citizens," dugang niya.

Niapila usab si Alcover ngadto sa CCENRO nga gawas sa mga campaign materials, angay usab tangtangon ang mga advertising poster ug tarpaulin nga gipanglansang o gibutang sa mga kahoy.

Ubos sa Republic Act 3571 o ang "Act to Prohibit the Cutting, Destroying or Injuring of Planted or Growing Trees, Flowering Plants and Shrubs, or Plants of Scenic Value along Public Roads, in Plazas, Parks, School Premises or in any other Public Pleasure Ground," gidili ang pagputol , pagguba , pagsamad sa mga kahoy ug mga buwak nga nahimutang sa mga karsada, plaza, suroyanan, palibot sa mga eskwelahan, o sa bisan asa nga pampublikong mga lugar.

Subay sa seksyon 4 sa maong balaod, ang bisan kinsang makalapas mahimong silutan sa prisión correccional sa pinakagamay nga panahon hangtod sa prisión mayor sa pinakagamay nga panahon. (BANAT NEWS)