41.8 kilong shabu gikatakdang sunogon

CEBU, Philippines — Karong Pebrero 13, 2025 pangsunogon na pud sa Philippine Drug Enforcement Agency (PDEA)-7 diha sa Cosmopolitan Funeral Homes sa Junquera Street,  Barangay Kalubihan, siyudad sa Sugbo ang mga nasakmit nga mga ilegal nga drugas nga nasang-at na ngadto sa korte ang mga kaso. Sigon ni PDEA-7 Director Alex Tablate nga moabot sa P284 million nga 41.8 kilong drugas ang ilang sunogon human nga nihatag na og pagtugot ang korte nga sunugon kini sa sunod semana.

Apil sa maong 41.8 kilo nga shabu ang 25 kilos nga shabu nga nasakmit sa otoridad gikan sa manag-inahang Edna ug Edward Loga diha sa Pier 4 sa Siyudad sa Sugbo sa miaging buwan.

"Siyempre nakita man gud nato ba this is common which is true ang feedback sa community sa social media actually nakita nato that's why ato pud ipakita sa ila nga this is what we’re doing kay ang common man gud nga duda sa community is basig asa na pud ba mabutang, basig mabalik na pud na sa so this is why we're doing this kay mao man gud ni atong mandate, considering nga dako-dako to so we want the public to know nga this is what PDEA is doing nga mag push ta aning mga immediate destruction," pasabot ni Tablate kun nganong giapil ang 25 kilos nga drugas.

Nabantayan diha sa social media ang mga posts sa netizens nga i-recycle lang kini gihapon sa mga otoridad ug uban pang mga pasangil.

Nasayran nga nagpadayon gihapon ang imbestigasyon sa PDEA-7 labot sa pagkasakmit sa 25 kilos nga drugas nga nagkantidad og P170 million. (BANAT NEWS)