Drugas ug armas nasakmit
CEBU, Philippines — Niresulta sa pagkompiskar sa dagkong putos sa gituohang shabu ang pagpatuman sa PNP Drug Enforcement Unit-Special Operations Group(SOU)-7 sa search warrant batok sa usa ka 31-anyos nga high value individual diha sa Sitio Abellana, Barangay Luz, siyudad sa Sugbo kagahapon sa kaadlawon.
Nadakpan sa mga operatiba si alyas Adot nga nagpuyo sa naasoy nga dapit. Ang Regional Trial Court, 7th Judicial Region, Branch 17, Cebu City ang nag-issue sa search warrant penetsahan Pebrero 3, 2025.
Gironda ang balay human nakadawat og impormasyon ang kapulisan nga namaligya kini og illegal nga drugas. Atol sa pagpatuman sa search warrant nakuha ang 50 gramong shabu nga nagkantidad og P340,000 sa iyang balay.
Samtang nasikop sa buhatan sa City Intelligence Unit sa CCPO gipanguluhan ni Police Lt.Colonel Jerrold Jake Manguerra ang ang usa ka 46 anyos nga lalaki nga taga Brgy. Binaliw niadtong Pebrero 5, 2025 diha sa Brgy. Kamputhaw tungod sa paghupot og armas ug shabu.
Nakadawat og taho gikan sa usa ka concerned citizen ang kapolisan bahin sa suspek kinsa ilang nakuhaan og usa ka .9mm pistol ug usa ka magazine nga adunay tulo ka bala. Nakuha usab ang nagkadaiyang pakete sa gituohang shabu nga mokabat sa balor P102,000 nga adunay 15 gramos ang timbang.
Sa laing operasyon, nadakpan sab ang usa ka 38-anyos nga lalaking taga Pasil sa mga sakop sa Pari-an Police Station human sa buy-bust operations diha sa Sitio Lower Lumar, Barangay T. Padilla ning Dakbayan sa Sugbo. Ang mga operasyon gipangulohan ni Police Major Marvin Fegarido ug niresulta sa pagkasakmit sa 25 gramos nga gituohang shabu nga mobalor og P170,000 ug buy-bust money. — Romeo D. Marantal, Rowena Capistrano (BANAT NEWS)
- Latest
