Kapitolyo nagplanong mopasaka og kaso batok sa DPWH

CEBU, Philippines — Ang Probinsiya sa Sugbo nagplano nga mopasaka og kasong kriminal ug administratiba batok sa opisyales sa  Department of Public Works and Highways (DPWH) Second District Engineering Office tungod kay giingong wala kini koordinasyon sa pagpatuman og road concreting project sa habagatang bahin sa Probinsiya sa Sugbo.

Gitumbok sa Kapitolyo nga ang gihimo sa DPWH 2nd District Engineering Office nakalapas sa Provincial Ordinance No. 2023-02 nga nagmando sa mga ahensiya sa gobiyerno sa national nga mokoordinar sa local government units sa Sugbo o sa Probinsiya sa Sugbo kalabot sa mga ipatuman nga programa ug proyekto niini sa lalawigan.

Apan nasayran sa gobernador nga nipadayon ang pagtrabaho sa DPWH ngadto sa mga dalan sa habagatan bisan pa nga nihangyo na siya nga dili ipadayon ang pagguba sa mga dalan nga maayo pa ang kondisyon ug butangan ra og aspalto ang mga dapit nga adunay buslot.

Matud ni Gobernador Gwendolyn Garcia nga gawas nga dili kini kalas sa pundo sa gobyerno, dili kini makahatag og kahasol sa mga moagi.

Apan matud usab sa Kapitolyo nga ang gihimo sa DPWH 2nd engineering district mao ang pagguba gihapon sa dalan ug pulihan og laing semento nga maoy nakasagabal karon sa mga motorista nga moagi ug nagdala kini og grabeng kahuot sa  trapiko tungod kay tag-usa ka dalan lang ang gamiton og puli-puli ang pag-agi sa mga sakyanan.

Ang maong mga dalan o national highway gilangkuban sa Pugalo, Alcoy - Obong Dalagutete ug sa Cawayan Dalaguete diin niabot sa 200 metros ang gitas-on sa gitrabaho.

Si Garcia nagkanayon nga daghan na siyang mga reklamo nga nadawat gikan sa mga motorista nga moagi diha sa maong dapit.  BDB BANAT NEWS