Libreng serbisyo sa mga barangay nagpadayon sa siyudad sa Mandaue
CEBU, Philippines — Nagpadayon ang kagamhanan sa dakbayan sa Mandaue sa paghatag og libreng serbisyo ngadto sa katawhan diha sa kabarangayan sa siyudad.
Gikahinangop sa mga molopyo sa tulo ka barangay sa siyudad sa Mandaue nga naglakip sa barangay Guizo, Mantuyong ug Tipolo ang gihatag nga libreng serbisyo.
Ang Barangayan Program gitumong aron mapaduol sa katawhan ang mga nag-unang serbisyo nga gihatag sa lokal nga kagamhanan.
Lakip sa mga libreng serbisyo mao ang medical check-up sa City Health Office ug nanghatag usab sila og tambal sa mga nanginahanglan.
Ang City Agriculture Office nag-apod-apod usab og mga seedlings nga ikatanom sa mga molopyo nga mahiligon sa backyard gardening.
Libreng hilot ug tupi usab ang serbisyo nga gihatag sa MCCTEST, samtang ang Persons with Disability Affairs Office (PDAO) naghatag og wheelchairs sa mga Persons with Disability kun PWDs.
Niabag usab ang mga sakop sa Philippine Army nga nihatag og libreng tupi.
Samtang ang City Veterinary Office nagpahigayon usab og libreng Anti-Rabies Injection alang sa mga binuhing hayop.
Naghatag usab og libreng mga serbisyo ang Housing and Urban Development Office, City Cooperative Office, Family Planning Services, CSWS, City Legal Office, Public Employment Service Office, City Nutrition Office, ug Mental Health Counseling. — /MEL (BANAT NEWS)
- Latest
