CEBU, Philippines — Usa ka lalake nga giingong miyembro sa New Peoples Army ang gidakop sa mga sakop sa Criminal Investigation and Detection Group(CIDG) Cebu City Field Unit sa gipatumang Oplan Salikop diha sa Plaza sa Katawhan, Cebu South Coastal Road, siyudad sa Sugbo, niadtong Biyernes sa buntag, Disyembre 13, 2024.
Ang akusado mao si Marlon Jakosalem alyas "Ka Ar-ar", 30, dunay kaipon ug nagpuyo sa siyudad sa Guihulngan, Probinsiya sa Negros Oriental. Gidakop siya pinasikad sa warrant of arrest sa kasong double murder nga giisyu ni Judge Rosario S. Carriaga, Assisting Judge sa Regional Trial Court Branch 64 sa Guihulngan City, Negros Oriental ug wala'y piyansa nga girekomendar.
Ang tracker team sa CIDG Cebu City Field Unit uban ang 3012th Air Intelligence and Security Squadron (AISS), 301st Special Mission Group (SMG), 300th Air Intelligence and Security Wing (AISW), Philippine Air Force (PAF) ug BGBNEAB (Brigade Group of BGEN Benito N. Ebuen Air Base) nihimo og manhunt operation batok sa mga CTG members nga miresulta sa pagkasikop ni Jakosalem.
Usa ka intelligence agent sa Philippine Air Force sa Lapu-Lapu City maoy nakakompirmar sa presensiya ni Jakosalem sa maong dapit.
Base sa imbestigasyon, si Jakosalem na-recruit sa usa ka indibidwal nga nailhan sa ngalan nga "Ka Jembo" sa Guihulngan City, Negros Oriental niadtong 2016 ug nalambigit siya sa engkwentro tali sa kasundalohan didto hangtud 2022.
Sa 2021, na promote isip Squad Leader sa Squad 1, Sandatahang Unit Propaganda, Platoon Central Negros 1, KR-CBNS ug tighikay sa sa recruitment sa bag-ong miyembro. Apan niadtong 2022 mipadayag sa iyahang intensyon nga mobuwag sa kalihokan ug diretsong mibiya sa grupo apan wala siyay pormal nga pagtahan sa gobiyerno.
Pagka 2023, usa ka intelligence report nasigpatan siya sa Cebu City apan ning bag-o lang siya hingpit natultolan nga vendor na og fried chicken sa Plaza.
Ang akusado miangkon nga nakasulod siya sa CTG niadtong 2017 apan pagka 2020 nigawas siya ug nanginabuhi og tarong sa Negros Oriental. Gidala niya iyang pamilya dinhi sa miaging tuig aron manginabuhi.
"Mo tuig nako karong Abril...Trabaho dala pamilya nanginabuhi og tarong, baligya ko’g chicken joy," sigon ni Jakosalem. IBM BANAT NEWS