Pundo ihatag sa Kapitolyo sa mga bise mayor

CEBU, Philippines — Human sa mga mayor, ang mga bise mayor na usab sa nagkadaiyang lungsod sa Probinsya sa Sugbo ang hatagan og pondo sa Kapitolyo alang sa proyekto sa imprastraktura.

Si Gobernaor Gwendolyn Garcia atol sa iyang pagtambong sa Vice Mayor’s League of the Philippines (VLMP Cebu Chapter) yearend assembly niadtong Disyembre 12 nagkanayon nga dako ang natampo sa suporta sa mga bise mayor sa tagsa tagsa niini ka mga mayor alang sa paghatag og serbisyo sa mga konstituwente niini.

“Kamo, mga vice mayors, who for the greater part have been most supportive of your mayors. And that is why we have, for the greater part, such a united province, moving in one direction; and we have been able to accomplish so much,” matud ni Garcia atol sa iyang mensahe sa mga bise mayor.

Sumala sa Sugbo News, ang news portal sa Probinsya sa Sugbo, nga 48 gikan sa 53 ka mga bise mayor sa mga lungsod ug siyudad sa Probinsya ang mitambong sa maong tigom, diin matag usa sa mga mitambong makadawat og tag P3 million.

Nagpasabot kini nga P149 million ang alokasyon niini sa Probinsya sa Sugbo.

Si Garcia mihangyo sa mga bise mayor nga kinahanglan nga matapos ang ilang proyekto sa ilang kasamtangang termino hangtud Hunyo 30 sunod tuig, sanglit adunay posibilidad nga pipila sa mga bise ang dili na mapili sa sunod nga eleksyon.  MEL BANAT NEWS