Appointment sa bag-ong treasurer sa Mandaue City wala una pirmahi

CEBU, Philippines — Giangkon ni Mandaue City Mayor  Glenn  Bercede nga wala siya mopirma sa appointment sa tawong mohulip sa kasamtangang  nagdumala  sa City Treasurers Office sa dakbayan tungod kay wala siya makaila niini.

Matud pa ni Bercede nahingangha siya sa dihang  ang mga personnel sa Department of Finance rehiyonal nga buhatan niabot sa iyang buhatan nga nagdala og tawo nga wala siya makaila sa personal  nga ilang girekomendar  ihulip kang kanhi Atty. Regal Oliva.

Si Oliva maoy dugay ng city treasurer sa siyudad apan ni-resign  kini sa katungdanan ning tuiga tungod sa pagdagan niini pagka-kongresista sa umaabot nga piniliay sa sunod tuig.

Si Bercede  miingon nga nakahukom siya nga dili  lamang una pirmahan ang appointment sa maong tawo tungod kay kinahanglan una niyang paminawon ang komento sa ubang mga opisyal  sa siyudad.

Giangkon niya nga gibati siya og kahingawa sa pagpirma sa appointment sa tawo nga wala gayod siya makaila , samot na kun kini maoy tahasan sa pagpangulekta sa buhis sa siyudad.

Si Bercede miingon nga sa pagkakaron magpabilin nga Officer -In- Charge sa CTO nga si  Julie Ballesteros nga nagserbisyo na sa maong buhatan sulod sa daghanan na kaayong katuigan

Misalign siya kang Ballesteros nga takos kini sa maong trabaho kay dugay na kining nagserbisyo  isip City Assistance City Treasurer sa siyudad  ubos sa pamunoan kaniadto ni Oliva.  IBM BANAT NEWS