Tanod gitinguhang mahatagan og dugang P2,000 nga allowance

CEBU, Philippines — Ipaubos sa public hearing ug second hearing ang gi-propose nga ordinansahon nga gipangamahanan ni Konsehal James Anthony Cuenco nga maghatag og dugang financial assistance alang sa mga kwalipikadong tanod traffic enforcers sa Dakbayan sa Sugbo.

Ug kong mopasar na kini sa konseho dugang P2,000 ang madawat sa mga tanod traffic enforcers matag buwan.

Base sa taho sa Cebu City Public Information Office nga ang kagamhanan naghatag og binuwan nga allowance ngadto sa tanang tinudlo nga mga empleyado sa barangay nga naglakip sa mga barangay tanod.

Giklaro ni Cuenco nga ulahi na ug ilakip pa kini sa 2025 annual budget sa city hall tungod kay wala pa kini hingpit nga naaprobahi ang maong ordinansa.

Samtang si Konsehal Noel Wenceslao, chairman sa Committee on Budget and Finance sa konseho sa siyudad nipasalig ngadto kang Cuenco nga kong maaprobahan ang maong ordinansahon maapil kini pagkarga sa supplemental budget ubos sa Peace and Order Program alang sa tuig 2025. BDB BANAT NEWS