VP Sara mihulga ni Marcos

CEBU, Philippines — Gipahugtan karon sa Presidential Security Command (PSC) ang seguridad sa presidential couple nga silang Presidente Ferdinand Marcos Jr. ug First Lady Liza Araneta-Marcos tungod sa gihulagway nilang “active threat” sumala pa sa Presidential Communications Office (PCO) kagahapon, adlaw nga Sabado, Nobiyembre 23.

Ang Executive Secretary maoy nipaabot na niini ngadto sa PSC alang sa matud pa dinaliang aksyon tungod matud pa seryuso kini nga hulga sa kinabuhi sa pangulo ug sa kapikas niini. Lakip sa matud pa gihulgang ipapatay mao si House Speaker Martin Romualdez.

"Any threat to the life of the President must always be taken seriously, more so that this threat has been publicly revealed in clear and certain terms," matud pa sa maong ahensiya sa report sa Philstar.com.

Sa sayo pa, si Bise Presidente Sara Duterte nangangkon nga duna na siyay gikontratang tawo nga mopatay kang Marcos, sa iyang asawa ug ni Romualdez, kini kun ang matud pa planong pagpatay kaniya matinuod.

"May kinausap na ako na tao. Sinabi ko sa kanya, kapag pinatay ako, patayin mo si BBM (President Marcos), si Liza Araneta, at si Martin Romualdez. No joke, no joke," si Duterte nagkanayon atol sa usa ka Zoom conference nga gi-post diha sa YouTube.

"Nagbilin na ako. ‘Pag namatay ako, huwag ka tumigil hangga’t hindi mo mapatay sila. And then he said, ‘Yes,’” dugang pa sa bise presidente diha sa video.

Ang maong pamahayag matud pa giluwatan niya human nga gimando sa House of the Representatives Committee on Good Government nga ibalhin gikan sa House detention room ngadto sa Correctional Institute for Women (CIW)  ang chief of staff ni Sara nga si Zuleika Lopez.

Ang  panel miisyu niining kamandoan human matud pa gilapas sa bise presidente ang mga patakarang gipatuman diha sa House bisan og makadaghan siyang gihangyo nga dili siya magpundo didto tungod sa iyang seguridad.

Si Duterte niinsister nga adto kini matulog sa opisina sa iyang igsuong si Kongresista  Paulo Duterte  sa Batasang Pambansa samtang naka-detain didto ang iyang chief of staff.

Tungod sa maong kagubot, nagpadala og daghang polis sa compound ug gi-lockdown kini alang sa seguridad sa bise presidente.

Si Lopez gipabalhog sa prisohan human siya gi cite in contempt sa House committee tungod sa pagsige og likay pagtubag sa mga pangutana bahin sa gialegar nga wala tarunga paggamit sap undo sa Office of the Vice President (OVP) ug sa Department of Education.

Si Lopez una nang miangkon nga nipirma siya og suwat nga nag-awhag sa Commission on Audit nga dili mosanong sa subpoena sa House nga nangayo og audit reports sa confidential fund disbursements ubos sa buhatan sa bise presidente.

Si Lopez gi-detain sa House detention room sukad pa niadtong Miyerkules sa gabii, Nobiyembre 20, tungod sa pasangil nga "undue interference."  Kagahapong adlawa, Sabado, gidala siya sa tambalanan human naglain ang lawas.

Ang bise presidente misaway sa House panel hearings nga may sagol pamolitika ang tumong ug ang iyang mga staff sa OVP nahimong “collateral victims” para lang siya lutoson.

Ang bise presidente makadaghang higayon nga wala tungaha ang imbitasyon sa House hearings bahin sa paggamit sa iyang confidential funds.

Si Duterte ug Marcos nag-tandem niadtong 2022 elections ubos sa “Uniteam” coalition, apan sugod sa ilang paglingkod sa katungdanan, niaslom na ilang relasyon.

Ang mga kaalyado sa pamilyang Duterte ug Marcos higpit karong nag-ilog aron makakuha og suporta sa katawhan para sa mga tag-as nga posisyon sa 2025 midterm elections ug sa umaabot nga 2028 presidential race. —Gikan sa Philstar.com/IBM BANAT NEWS