CEBU, Philippines — Nibisita sa Dakbayan sa Sugbo ang Indian Ambassador to the Philippines nga si Harsh Kumar Jain aron sa pagtimaan sa pagpalig-on sa relasyon tali sa India ug Pilipinas kagahapon, Nobiyembre 21, 2024.
Ang pagbisita ni Jain mainitong gihangop ni Bise Mayor Donaldo “Dondon” Hontiveros diha sa mayor’s lounge.
Base sa taho sa Cebu City Public Information Office, nibisita usab si Jain diha sa Basilica Minore del Santo Niño ug sa pipila ka mga makasaysayanon nga mga dapit sa siyudad.
Nangangha kini sa dekalidad nga pagpreserba sa kasaysayan sa siyudad diin hangtud karon nagpabilin pa kini nga mahimamat sa bag-ong henerasyon.
Gitumbok ni Jain ang historical linkages tali sa India ug Pilipinas diin nagpakita kini og interest sa pagpalawom sa bilateral nga relasyon tali sa duha ka nasud.
Dugang ni Jain nga plano niya nga mobalik sa Sugbo sa sunod tuig isip kabahin sa Indian Trade Mission diin tumong niini ang pagpalambo sa ekonomikanhong panag-uban ug dugang mga oportunidad alang sa kolaborasyon. BDB BANAT NEWS