Garcia nanumpa na isip mayor sa siyudad sa sugbo  

CEBU, Philippines — Dili na acting mayor, kon dili FULL PLEDGED mayor na sa Dakbayan sa Sugbo si Raymond Alvin Garcia human siya mihurar atubangan sa opisyal sa Department of Interior and Local Government kon DILG hulip ni mayor Michael Rama nga gi-dismiss sa Ombudsman tungod sa kasong nepotismo.

Kagahapon, Miyerkules mihurar sa katungdanan isip full pledge mayor sa Cebu City si Raymond Alvin Garcia atubangan ni DILG-7 Regional Director Leocadio Trovela.

Si Garcia giubanan sa iyang asawa, anak, inahan ug amahan nga si kanhi mayor Alvin Garcia.

Matud pa ni Trovela, dili maapektohan ang bisan unsa nga legal remedy nga gihimo sa kampo ni Rama ang pag install nila kang Garcia isip full pledge mayor sa Dakbayan sa Sugbo.

Igo ra matud pa nipatuman ang DILG sa desisyon nga gipagawas sa Ombudsman nga nagpahamtang kang Rama og dismissal sa serbisyo.

Gipadayag ni Garcia nga padayonon lang niya ang iyang nasugdan nga gihimo sulod sa pipila ka buwan nga nagserbisyo isip acting mayor ug karon nga siya na ang mayor adunay  mga kausaban nga ipatuman sa mga departamento. Gipasalig usab niya nga ipadayon ang mga nasugdang programa sa administrasyon ni Rama sama sa pagsulbad sa suliran sa traffic, baha ug hatagan sab niya og prayoridad ang 2025 budget alang sa health care ug housing.

Apan giklaro ni Garcia nga dili niya sagopon ang Singapore like Cebu City nga tagline ni Rama tungod kay adunay kaugalingon nga identity ang siyudad ug dili haum nga tawagon ug Singapore ang siyudad tungod kay kita ang Dakbayan sa Sugbo. — MEL BANAT NEWS