BSF farming giplanohan aron maminusan ang basura sa barangay
CEBU, Philippines — Nagplano ang Solid Waste Management Board (SWMB) nga pasiugdahan ang Black Soldier Fly (BSF) farming isip usa ka cost-effective nga paagi aron makunhuran ang biodegradable nga basura sa mga barangay.
Ang BSF farming mao kini ang paggamit sa mga ulod sa black soldier fly (Hermetia illucens) isip mga importanteng decomposer sa pagbungkag sa mga organikong basura ug paghimo niini nga organikong abono ug pagkaon sa hayop.
Matud pa sa overseer sa SWMB nga si Ma. Emma Azcarraga Ramas nga ilado ang BSF farming sa ubang nasud gumikan kay mahimo kini sa limitadong luna ug ang mga produkto niini magamit sa nagkadaiyang paagi.
Dugang pa ni Ramas nga kung itugot sa kagamhanan, buot sa buhatan nga magbutang og “incubator hub” sa South Road Properties (SRP) aron mapatuman ang maong pamaagi. Gani, andam sab sila nga ipakita kini sa kadaghanan aron nga mapatakap ang pamaagi sa pag-compost og basura.
Si Frederic Vincent Agcaoli kinsa mao ang national chairman for project and development sa Alpha Kappa Rho (Akhro) miingon nga gitanyag kini niya nga serbisyo sa SWMB aron nga mokunhod ang problema sa basura sa syudad.
Ang BSF dili kini sama sa ubang housefly gumikan kay dili kini tigdala og mga sakit ug pathogens. Makadugta sab kini og organikong basura sulod sa 15 ka adlaw ug ang mga ulod niini mahimong gamiton nga paka-on sa mga manok, baboy, ug bisan tilapia.
“Black soldier fly kay mokaon siya tanan, even kanang mga carcass ug dead animals. That is why the black soldier fly (farming) is a game-changer,” suma pa ni Agcaoli.
Ang BSF dako kining tabang sa mga poultry ug fish farmers pinaagi sa pagdugang sa ilang kaalam sa ilang paagi sa agrikultura.
“We are promoting BSFs not just for basura, but it can also help our local farmers. Why? Because we have a problem when it comes to (buying animal) feed. Kay taas kaayo ang feed cost. Most of our backyard (poultry) farmers, ang ilang problema kay ang cost sa feed,” saysay pa niya. — MEL BANAT NEWS
- Latest
