CEBU, Philippines — Patay ang driver sa usa ka 14-wheeler truck nga nagkarga og mga kabilya human nabangga sa poste diha sa National Highway sa Barangay Poblacion, Lungsod sa Barili kagahapon sa alas 11 sa buntag.
Ang namatay mao si Rowel Merasol, 32, residente sa Barangay Ocaña, dakbayan sa Carcar ug driver sa 14-wheeler Isuzu Prime Mover.
Sa impormasyon sa Barili Police Station gikan sa dakbayan sa Carcar ang trak paingon habagatan ug nagkarga kini og mga kabilya nga i-deliver sa usa ka hardware sa Lungsod sa Dumanjug.
Base sa inisyal nga imbestigasyon sa kapulisan giingong nawad-an og kontrol ang driver sa dihang nipalyar ang brakes niini ug nabangga sa usa ka poste.
Gumikan sa kakusog sa pagbangga nakabsan og kinabuhi ang drayber diha-diha dayon.
Nakaigo sab kini og laing sakyanan ug motorsiklo apan wala ra maunsa ang mga sakay niini.-- IBM BANAT NEWS