Inahan naunong  og kamatay sa gihimugso niyang bata daplin sa karsada

CEBU, Philippines — Nidangoy-ngoy og hilak ang pamilya sa usa ka 39-anyos nga inahan dihang ilang nakita nga patay'ng lawas niini.

Ang namatay mao si Mary Ann Tampos, residente sa Barangay Tisa, Siyudad sa Sugbo ug nag-estar diha sa General Maxilom Avenue sa nahisgutang siyudad.

Gikataho nga kagahapon sa alas 7:00 sa buntag nagbati si Tampos ug diha kini sa karsada nanganak.

Usa sa mga traffic enforcer nga si Sheila Marie Nicolasora nga nitabang ni Tampos nagkanayon nga nigimaw na ang ulo sa bata.

Nakita nila ang bata nga nag-ung-ong na sa pwerta ug wala pa nakagawas ug nanglagom na kini.

Base sa taho nga usa ka nurse nga naagi sa lugar ang nitabang usab kang Tampos aron mapaanak kini.

"Mao to naay nurse niabot murag gi-push gamay, mao to nigawas, paggawas sa bata mao to patay najud ang bata unya ang umbilical cord gikan sa tiyan, wapa mogawas", padayag sa traffic enforcer.

Ang mga nitabang ni Tampos nanawag og ambulansiya aron madala siya sa tambalanan apan giingong nagdumili kini ug nimando sa ambulance staff nga magpakanaog na ug nipirma pa kini og waiver.

Apan namatay usab si Tampos diha sa daplin sa karsada uban sa iyang masuso nga gihimugso tungod kay wala mogawas ang inunlan ug gidugoan kini. — BDB BANAT NEWS