Mipusil sa anak, naghikog patay

CEBU, Philippines — Usa ka amahan ang giingong mipusil sa iyang anak nga babaye ug pagkahuman nag-unay kini pagpusil sa iyang kaugalingon nga niresulta sa iyang kamatayon diha sa Barangay Lamacan, Lungsod sa Sibonga, pasado alas nuybe sa gabii adlaw nga Lunes.

Sa initial nga imbestigasyon sa Sibonga Municipal Police aduna nay problema daan ang suspetsado sa iyang pamilya, human ang asawa niini ang nilayas tungod sa giingong pagpanapat niini.

Ang inahan sa biktima nangayo kaniadto og barangay protection order aron dili kini makaduol kaniya.

Apan ang suspetsado giingong nituyo pag-adto sa balay sa iyang 28-anyos nga anak babaye kay suguon nga patawgan ang inahan aron papaulion.

Apan gikatahong gitubag kini sa anak nga biktima nga dili na niini papaulion ang inahan kay pasakitan ra kini sa suspetsado.

Niining tungora gikatahong napungot ang suspek ug gipusil ang iyang anak kinsa naigo sa sampot. Nakugang ang anak sa dihang kalit nga gipusil sa suspek ang kaugalingon diha sa tuo nga tampihak.

Ang duha gidali pagdala sa tambalanan apan ang amahan nakutloan kini sa iyang kinabuhi alas-4 sa kaadlawon kagahapon adlaw nga Martes.

Ang anak anaa na hinoon sa stable nga kahimtang ug nagpaalim nalang sa tambalanan.

Si P/CMSgt Michelle Ponce sa Sibonga MPS mipahimangno sa publiko nga unsa man gani ang problema sa pamilya kinahanglan kining estoryahan ug dili gamitan og bayolenteng mga lakang kay walay problema nga dili masulbad sa tinarong nga pamaagi. Irish Laborte (BANAT NEWS)